TUMUENZI Dk MAKAIDI KWA KUIONDOA CCM MADARAKANI

Mgombea mwenza wa urais wa chama cha demokrasia na maendeleo (Chadema ), anayeungwa mkono na vyama vinavyounda umoja wa katiba ya wananchi (UKAWA), Mh. Juma Duni Haji amewataka watanzania hasa wanaopenda mabadiliko kumuenzi aliyekuwa mwenyekiti wa chama cha NLD Dk. Emmanuel Makaidi kwa kukiondoa chama cha mapinduzi madarakani Oktoba 25.

Akihutubia mkutano wa hadhara uliofanyika katika eneo la Kemondo jimbo la Bukoba vijijini mkoani Kagera Mh. Duni amesema kuwa amepokea taarifa za kifo cha Dk. Makaidi kwa majonzi makubwa kwani licha tu ya kuwa ni rafiki yake wa karibu pia alimsaidia sana katika harakati za kutafuta mabadiliko yanayolenga kuiondoa CCM madarakani kwa kushindwa kuwaletea wananchi maendeleo huku raslimali zilizopo nchini zikiendelea kuwanufaisha watu wachache na huduma za kijamii zikizidi kudumaa.

Said Issa Mohammed, Makamu mwenyekiti wa Chadema taifa Zanzibar anasema kifo cha Dk. Emmanuel Makaidi aliyekuwa mwenyekiti Mwenza wa UKAWA na mgombea ubunge katika jimbo la masasi mkoani Lindi, kimeacha pengo kubwa katika medani za kisiasa nchini kutokana na msimamo wake wa kutetea wanyonge, huku katibu wa jumuiya ya wanawake wa chama cha wananchi – CUF taifa, Fatuma Kalembo akiwataka akinamama kujitokeza kwa wingi kwenda kupiga kura siku ya tarehe 25 mwezi huu ili kubadili mwelekeo wa siasa za Tanzania.