WANANCHI WATEMBEA KM 27 KUFUATA MAHAKAMA,TZ

WANANCHI wa kata ya Urughu,tarafa ya Ndago,wilayani Iramba hawana huduma ya Mahakama kwa zaidi ya miaka kumi sasa hali inayochangia kutembea umbali wa kilomita 27 kufuata huduma hiyo makao makuu ya tarafa hiyo.

Hayo yamebainishwa  na diwani wa kata ya Urughu(CCM),Simoni Tyosela wakati akielezea changamoto wanazopata wananchi wa kata ya Urughu kutokana na kukosekana kwa huduma hiyo muhimu kwao.

Aidha Tyosela ambaye alimaliza muda wake wa uongozi mwanzoni mwa mwezi huu,alifafanua kwamba tangu alipoingia madarakani mwaka 2010 kipaumbele cha kata hiyo kilikuwa kuhakikisha Mahakama inafanyakazi ili kuwapunguzia wananchi adha ya kufuata huduma hiyo umbali mrefu.

Kwa mujibu wa Tyosela walishindwa kuendelea na ujenzi wa Mahakama baada ya kuagizwa kujenga kituo cha afya na Maabara kutokana na kaulimbiu ya serikali kwa sasa kuweka kipaumbele  ujenzi wa maabara.licha ya kwamba bajeti ya mwaka wa fedha wa 2015.2016 kwa kushirikiana na Shirika la HAPA ambao tayari wameonyesha nia ya kuwasaidia baada ya kuwasilisha maaombi yao.

Akizungumzia malalamiko ya wananchi wa kata hiyo ya Urughu,Hakimu Mkazi Mfawidhi katika Mahakama ya wilaya ya Iramba,Consolata Singano alisema wilaya hiyo inakabiliwa na upungufu wa Mahakimu wa Mahakama hali inayochangia wananchi kutembea umbali mrefu kufuata huduma hiyo.