EWURA imezionya kampuni za mafuta kuacha hujuma ya kulikosesha taifa nishati wakati wa uchaguzi.

Mamlaka ya udhibiti wa maji na nishati -EWURA imezionya kampuni za mafuta kuacha kufanya hujuma yoyote ile ya kulikosesha taifa nishati hiyo wakati wa uchaguzi mkuu kwa kuwa kuna hazina ya kutosha ya nishati hiyo nchini huku wamiliki wa kampuni hizo wakiomba ulinzi wa ziada kipindi hiki.

Mkurugenzi mkuu wa mamlaka hiyo Felix Ngalamgosi amesema iwapo mafuta yatakosekana katika kituo chochote kile nchini watakichukulia kuwa ni hujuma na wahusika watachukuliwa hatua stahili ikiwemo kunyang'anywa leseni na kuwa kuanzia sasa wameimarisha ukaguzi katika vituo vya mafuta. 

Kwa upande wao wakuu wa makampuni hayo wamesema wanahofia usalama wa maghala yao na vituo vya mafuta kwani katika uchaguzi jambo lolote ikiwemo vurugu vinaweza kutokea hivyo wameiomba serikali kuimarisha ulinzi katika maeneo hayo.

Mkurugenzi mkuu wa EWURA amewaambia wakuu hao wa makampuni ya mafuta kuwa watanzania hawana kawaida ya kufanya vitendo vya uvunjifu wa amani wala uharibifu wakati wa uchaguzi lakini hata hivyo serikali itaimarisha ulinzi katika maeneo yanayohifadhi mafuta.