Tume yatakiwa kuafikiana na vyama vya siasa kuepusha vurugu Sumbawanga.

Zikiwa zimesalia siku tano tu ili taifa liingie kwenye zoezi la uchaguzi mkuu,baadhi ya viongozi wa dini na wanasiasa mkoani Rukwa, wametoa wito kwa tume ya taifa ya uchaguzi ifanye kikao cha maridhiano na vyama vya siasa,ili kuwe na kauli moja juu ya siku ya upigaji kura kuliko ilivyo hivi sasa,ambapo wakati tume inasema watu wakipiga kura warudi majumbani wanasiasa wanahamasisha watu wakae umbali uliowekwa kisheria kulinda kura zao.

Viongozi hao wakiongea kwenye jukwaa la amani lililoandaliwa na asasi ya Sumango mjini Sumbawanga,wamesema kauli hizo mbili zinazokinzana kwa kiasi kikubwa,zinaleta mkanganyiko mkubwa kwa wananchi ambao wanazisikia kutoka pande hizo mbili,na kama isipofanyika juhudi ya makusudi zinaweza kuwa chanzo cha uvunjifu wa amani,kwa kuzua ghasia siku ya kupiga kura na kuathiri zoezi zima la uchaguzi mkuu.

Akiongea kwenye jukwaa hilo la amani kabla na baada ya uchaguzi mkuu, mratibu wa muungano wa asasi za kiraia wilayani Sumbawanga Sumango Bw.Vicent Kuligi,amesema lengo la kufanyika kwa jukwaa hilo ni kuwakutanisha viongozi wa ngazi mbalimbali mkoani Rukwa,ili wajadili namna bora ya kuienzi na kuitunza amani iliyopo, kwani zoezi la uchaguzi mkuu mara kwa mara limekuwa likiacha majeraha mbalimbali katika taifa